Manzil woh hi hai

Chanda woh hi hai,
sooraj woh hi hai|
Dharti maa ka
charitra woh hi hai|

Granth woh hi hai,
Seekh woh hi hai|
Shiksha ke prayog
sisak gaye hai|

Har desh mein koi
Ganga maiya hai
Har desh ki
Ganga maili hai|

Manzil woh hi hai,
raah woh hi hai
Musafar ke kadam
bhatak gaye hai||

Deewangi

Nazar nazar ki baat hai
Khoobsurati kissi mein kam nahi
Dekhne waale ki kadar hai
Aankhon ki koi farmaish nahi|

Husn' ki milkat ka ek hi wajood
Taareef kadardaan ki hai nahi
Deewane kayee iss mehefil mein
Deewangi ki kashish mein hum nahi|

Yu tho hum bhi deewane hote
Dil saath magar tha nahi
Taqdeer jo hamari kayam hai
Ai dost, hum taqdeer se nahi|

Hum se hai Zindagi ...

zindagi se hum kuch chahate hai
Zindagi humse bhi kuch chahati hai
Is chahat ki daud mein aakhir
Jeet zindagi ki hoti hai!

Jab hum apne tevar badalte hai
Jeet ke irade leherate hai
Zindagi kab baazee le jaati hai
Hum hairan hokar sochte hai!

Kabhi socha humne zindagi kya hai
Kabhi samjha humne hum kya hai
Aakhir yeh ehsaas hua yaaron
Zindagi se hum aur humse zindage hai!